Yunus Tahseen
shor se paak shab-o-roz guzare ghar men
ham ki tarse hi rahe koi pukare ghar men
ham yatimon ko kahan aate the naḳhre karne
ya.ani jhagḌa nahin hota tha hamare ghar men
ham to bas ek hi kone men paḌe rahte the
aur mahrumi raha karti thi saare ghar men
ayaten kaan men paḌti thiin sahar hone par
ham to rahte the jahan bhar se niyare ghar men
ek mamta thi jise ham ne ḳhuda samjha tha
jab vo hansti thi utarte the sitare ghar men
ek hasrat ki main huqqe ki chilam bhar kar duun
ek ḳhvahish ki mira baap khankare ghar men
char-divari thi ghurbat bhi thi ya.ani ‘tahsin’
ek divar ziyada thi hamare ghar men
Leave a Reply