Gautam Rajrishi
lamha guzar gaya hai ki arsa guzar gaya
hai kaun vo jo vaqt ki sazish ye kar gaya
ab umr to ye biit chali sochte tumhen
itna hua hai haan ki zara main sanvar gaya
simTa tha jab talak vo hatheli men Thiik tha
pahuncha labon pe lams to nas-nas bikhar gaya
yuun to dahak raha tha vo suraj sa duur se
jo paas ja ke chhu liya kaisa sihar gaya
dekhun tujhe qarib se fursat se chain se
mera ye ḳhvab mujh ko liye dar-ba-dar gaya
ik roz tera naam sar-e-rah le liya
chalta hua ye shaghl achanak Thahar gaya
misra.a sisak raha tha akela jo der se
yaad us ki aa ga.i to ghazal men utar gaya
Leave a Reply