aks ubhra na tha a.ina-e-dil-dari ka
hijr ne khinch diya da.era zangari ka
naaz karta tha tavalat pe ki vaqt-e-ruḳhsat
bhed saa.e pe khula shaam ki ayyari ka
jis qadar ḳharch kiye saans hui arzani
nirḳh girta gaya rasm-o-rah-e-bazari ka
raat ne ḳhvab se vabasta rifaqat ke evaz
rasta band rakha din ki numudari ka
aisa viran hua hai ki ḳhizan roti hai
kal bahut shor tha jis baagh men gul-kari ka
be-sabab jama.a to karta nahin tiir o tarkash
kuchh hadaf hoga zamane ki sitamgari ka
pa-ba-zanjir kiya tha mujhe asani ne
marhala ho na saka tai kabhi dushvari ka
mutma.in dil hai ajab bhiiḌ se gham-ḳhvaron ki
silsila tuul pakaḌ le na ye bimari ka
Leave a Reply