jab se mire raqib ka rasta badal gaya
tab se mire nasib ka naqsha badal gaya
shirin tha kitna aap ka andaz-e-guftugu
do-char sikke aate hi lahja badal gaya
kis ki zaban se mujhe dekho ḳhabar mujhe
kaise mire harif ka chehra badal gaya
un ke badalne ka mujhe afsos kuchh nahin
afsos ye hai apna hi saaya badal gaya
jab se baḌon ki ghar se hukumat chali ga.i
jannat-numa makan ka naqsha badal gaya
rahon ki ḳhaak chhanta phirta huun aaj tak
rahbar badal gaya kabhi rasta badal gaya
kahta hai us ke jaane se kuchh bhi nahin hua
‘mahtab’ jabki dil ka vo Dhancha badal gaya
Leave a Reply