Anwar Sadeed
zor se andhi chali to bujh ga.e saare charagh
gum hue jaate hain tariki men manzar aur main
haath se bachchon ke nikle meri jholi men gire
ban ga.e hain dost ye bachchon ke patthar aur main
par nahin lekin mayassar taqat-e-parvaz hai
dekhiye uḌte fazaon men kabutar aur main
ab tamaniyyat bahut mahsus hoti hai mujhe
ho gaya hai ham-suḳhan niila samundar aur main
kaise kaise ḳhub-ru chehre the sab ke samne
mahv-e-hairat ho gaya hai saara daftar aur main
koi bhi pechidgi haa.el nahin anvar-‘sadid’
zindagi hai samne manzar-ba-manzar aur main
Leave a Reply