ek shab halki si jumbish mujhe mahsus hui
main ye samjha mire shanon ko hilata hai koi
aankh uthai to ye dekha ki zamin hilti hai
jis jagah shai koi rakkhi hai vahin hilti hai
sahn-o-divar ki jumbish hai to dar hilte hain
bahar aaya to ye dekha ki shajar hilte hain
koi shai jumbish-e-paiham se nahin hai mahrum
ek taqat hai pas-e-parda magar na-malum
chand lamhe bhi ye nairangi-e-alam na rahi
zalzala khatm hua jumbish-e-paiham na rahi
hairat-e-did se angusht-ba-dandan tha main
shahid-e-jalva-e-qahhari-e-yazdan tha main
dafatan ek sada ah-o-fughan ki aai
mere allah ye ghadi kis pe musibat laai
gul kiya zalzala-e-qahr ne kis ghar ka charagh
kis pe dhaya ye sitam kis ko diya hijr ka daagh
ja ke nazdik ye nazzara-e-hirman dekha
ek hasina ko ba-sad hal-e-pareshan dekha
baizavi shakl men the husn ke jalve pinhan
aankh men sehr bhara tha magar aansu the ravan
main ne ghabra ke ye puchha ki ye halat kyuun hai
teri hasti hadaf-e-ranj-o-musibat kyuun hai
boli ai shaer-e-rangin-tabiat mat puchh
roz-o-shab dil pe guzarti hai qayamat mat puchh
log duniya ko tiri mujh ko zamin kahte hain
ahl-e-zar mujh ko mohabbat men hasin kahte hain
main unhin husn-paraston ki huun tadpai hui
tujh se kahne ko ye raaz aai huun ghabrai hui
zar-paraston se hain bad-dil miri duniya ke gharib
hain giraftar-e-salasil miri duniya ke gharib
mujh se ye taaza balaen nahin dekhi jaati
zalimon ki ye jafaen nahin dekhi jatin
chahti huun mire ushshaq men kuchh farq na ho
muft men kashti-e-ehsas-e-vafa gharq na ho
ek vo jis ko mayassar hon imarat-o-naqib
ek vo jis ko na ho phuns ka chhappar bhi nasib
sahab-e-daulat-o-zi-rutba-o-zardar ho ek
be-nava gham-zada-o-bekas-o-lachar ho ek
ek mukhtar ho, aurang-e-jahanbani ka
ik muraqqaa ho gham-o-ranj-o-pareshani ka
sakht nafrat hai mujhe apne parastaron se
chhin lete hain mujhe mere talab-garon se
chira-dasti ka mita deti hain sab jah-o-jalal
haif-sad-haif ki haail hai gharibon ka khayal
ye na hote to dikhati main qayamat ka saman
ye na hote to mitati main ghurur-e-insan
ek karvat men badal deti nizam-e-alam
ik ishare hi men ho jaati hai ye mahfil barham
ik tabassum se jahan barq-ba-daman hota
na ye araishen hotin na ye saman hota
har ada puchhti sarmaya-paraston ke mizaj
kuchh to farmaiye hazrat ki hain kis haal men aaj
lakh-pati sankh-pati be-sar-o-saman hote
jaan bach jaae bas is baat ke khvahan hote
barsar-e-khak nazar aate hain qasr-o-aivan
ashk-e-khunin se mire aur bhi uthte tufan
meri aghosh men sab ahl-e-sitam aa jaate
mere bartav se bas naak men dam aa jaate
baaz ke munh gham-e-alam se kaale karti
baaz ko maut ki devi ke havale karti
khun-e-zardar hi mazdur ki mazduri hai
main jo khamosh huun ye bais-e-majburi hai
meri aghosh men jabir bhi hain majbur bhi hain
mere daman hi se vabasta ye mazdur bhi hain
zabt karti huun jo gham aata hai sah jaati huun
josh aata hai magar kaanp ke rah jaati huun
Leave a Reply