Shahid Kamal
dhuup ke zard jaziron men numu zinda hai
rang-e-ashob fazaon men lahu zinda hai
ḳhvab dar ḳhvab bas ik chiḳhte sahra ka sukut
aur ankhon men vahi diid ki ḳhu zinda hai
shaḳh-e-mizhgan pe mahakne lage zaḳhmon ke gulab
pichhle mausam ki mulaqat ki bu zinda hai
mere saaqi tire jan-baḳhsh labon ka hai ye faiz
dast-e-mai-kash men abhi tak jo subu zinda hai
shal hua jaata hai kyuun haath mire qatil ka
zad pe ḳhanjar ke abhi ḳhushk gulu zinda hai
kapkapi fart-e-nadamat se hai maujon men abhi
tishna-lab kaun sar-e-sahil-e-ju zinda hai
kitni jan-soz hai is shahr-e-munafiq ki hava
is pe ‘shahid’ mujhe hairat hai ki tu zinda hai
Leave a Reply