Dil Se Puchha Tu Kahan Hai To Kaha Tujhko Kya

dil se puchha tu kahan hai to kaha tujh ko kya

kis ki zulfon men nihan hai to kaha tujh ko kya

chashm-e-giryan se shab-e-vasl men puchha main ne

ab tu kyuun ashk-fishan hai to kaha tujh ko kya

jab kaha main ne ki niin bolte ho gaali bin

jaan ye kaun zaban hai to kaha tujh ko kya

kahne laaga dil-e-gum-gashta tira hai mujh paas

jab kaha main ne kahan hai to kaha tujh ko kya

jab kaha main ne ki ai jaan tiri surat par

shefta pir-o-javan hai to kaha tujh ko kya

jab kaha main ne ki ai sarv-e-riyaz-e-ḳhubi

kis ka tu afat-e-jan hai to kaha tujh ko kya

dil se ‘bedar’ ne puchha ki tire siine par

kis ke navak ka nishan hai to kaha tujh ko kya

Leave a Comment