ḳhud ko majnun kabhi farhad kiya hai main ne
vaqt apna baḌa barbad kiya hai main ne
kaam ye bhi mire sayyad kiya hai main ne
ḳhauf dil se tira azad kiya hai main ne
ek patthar-sifat insan se mohabbat kar ke
ai gham-e-dil tujhe ijad kiya hai main ne
shaḳh-e-dil par tiri yadon ka basera kyon hai
in parindon ko to azad kiya hai main ne
yuun khilaya hai tire dil men mohabbat ka gulab
dasht aise koi abad kiya hai main ne
ik ibadat se kahan kam hai mohabbat meri
tujh ko aayat ki tarah yaad kiya hai main ne
tujh ko duniya ke tamashon se bachne ke liye
jaane kya kya miri aulad kiya hai main ne
hukmarani pe jise naaz bahut tha ‘ḳhalid’
us ko amada-e-fariyad kiya hai main ne
Leave a Reply