Poet
zindagi se thak ke us kuche men huun baiTha hua
jaise apne vaqt ka suufi baḌa pahuncha hua
jis tarah badal baras jaa.en nikhar jaane ke ba.ad
aaj aansu bah ke dil ka bojh kuchh halka hua
jaane kab se dhuup men pyase paḌe the ḳhar-e-dasht
mere talvon ka sahara mil gaya achchha hua
shahr-e-be-ehsas men meri sada-e-ehtijaj
tiir ho jaise andhere men koi chhoḌa hua
tarz-e-istifsar kab hai meri baton ka javab
ye koi andaz hai phir kya hua phir kya hua
zindagi raqsan ho ‘mahshar’ jhuum uTThe ka.enat
ḳhvab se uTTha huun main angḌa.iyan leta hua
Leave a Reply