dosti us ki dushmani hi sahi
dost to ho vo mudda.i hi sahi
masti-o-bahs-e-uzr-e-kaffara
tauba se tauba ham ne ki hi sahi
hai agar kuchh vafa to kya kahne
kuchh nahin hai to dil lagi hi sahi
ji hai ye bin lage nahin rahta
kuchh to ho shaghl-e-ashiqi hi sahi
mohtasib ḳhatm kijiye hujjat
pi hai to ḳhair ham ne pi hi sahi
haif ḳhamyaz-ha-e-hasrat-o-shauq
zindagani kashakashi hi sahi
jaan de kar liya hai nam-e-vafa
maut bhi ham ne mol li hi sahi
milte hain mudda.i se milne do
ki miri na-ḳhushi ḳhushi hi sahi
bosa dene ki chiiz hai aḳhir
na sahi har ghaḌi kabhi hi sahi
qatl hote hain qatl hote hain
ahd-e-dil daur-e-nadari hi sahi
ai ‘qalaq’ nasehon se kya takrar
maan ik baat maan li hi sahi
Leave a Reply