Poet
apne baare men jab bhi socha hai
us ka chehra nazar men ubhra hai
tajrabon ne yahi bataya hai
aadmi shohraton ka bhuka hai
dekhiye to hai karvan varna
har musafir safar men tanha hai
us ke baare men sochne vaalo
dekh lo ab ye haal apna hai
kaun bandish laga.e ḳhushbu ki
ishq fitrat ka ik taqaza hai
yaad aa.i hai jaane kis kis ki
lab pe jab zikr us ka aaya hai
fikr ki talḳhiyon men gum ho kar
aadmi be-sabab bhi hansta hai
arzumand koi ho to kahun
mere dil men bhi ik tamanna hai
mere chehre pe jo likha hai ‘nazar’
ghaur se kis ne us ki samjha hai
Leave a Reply