meer-taqi-meer

Burqa Utha Tha Rukh Se Mere Bad-Guman Ka

burqa utha tha rukh se mire bad-guman ka

dekha to aur rang hai saare jahan ka

mat maniyo ki hoga ye be-dard ahl-e-din

gar aave shaikh pahan ke jaama quran ka

khubi ko us ke chehre ki kya pahunche aftab

hai us men is men farq zamin asman ka

abla hai vo jo hove kharidar-e-gul-rukhan

us saude men sarih hai nuqsan jaan ka

kuchh aur gaate hain jo raqib us ke ru-ba-ru

dushman hain meri jaan ke ye ji hai taan ka

taskin us ki tab hui jab chup mujhe lagi

mat puchh kuchh suluk mire bad-zaban ka

yaan bulbul aur gul pe to ibrat se aankh khol

gul-gasht sarsari nahin us gulistan ka

gul yadgar-e-chehra-e-khuban hai be-khabar

murgh-e-chaman nishan hai kasu khush-zaban ka

tu barson men kahe hai milunga main ‘mir’ se

yaan kuchh ka kuchh hai haal abhi is javan ka

More Poems

Leave a Comment