Abdurrahman Wasif
jahan-e-fikr pe chamkega jab sitara mira
hunar zamane pe tab hoga ashkara mira
abhi se mat mire kirdar ko mara hua jaan
tire fasane men zikr aaega dobara mira
tujhe darahim-o-dinar ki shahi zeba
main mutmain huun ki lafzon pe hai ijara mira
ye ishtiyaq miri dastaras vahan tak ho
ye intizar vo kis vaqt hoga saara mira
rumuz-e-ishq se kab hogi ashnai tiri
mire nadim tu samjhega kab ishara mira
zamin-e-qibla-e-avval tujhe khuda rakhe
ki dil hua hai tire gham men paara paara mira
Leave a Reply