Imran Aami
koi mera imaam tha hi nahin
main kisi ka ghulam tha hi nahin
tum kahan se ye but uTha laa.e
is kahani men raam tha hi nahin
jis qadar shor-e-ab-o-gil tha yahan
us qadar ehtimam tha hi nahin
is liye saadh li thi chup main ne
is se behtar kalam tha hi nahin
ham ne us vaqt bhi mohabbat ki
jab mohabbat ka naam tha hi nahin
tu kahan raste men aa ga.i hai
zindagi tujh se kaam tha hi nahin
vaqt ne la khaḌa kiya us ja
jo hamara maqam tha hi nahin
is liye ḳhaas kar diya gaya ishq
aam logon ka kaam tha hi nahin
Leave a Reply