Ehsan Danish
hujum-e-ranj se dil ko masarrat hoti jaati hai
ki mujh par aa.ina apni haqiqat hoti jaati hai
ye kis ta.amir-e-naqis ki bhari jaati hain buniyaden
ki duniya be-charagh-e-admiyat hoti jaati hai
vo be-parda harim-e-sha.iri men aate jaate hain
murattab meri tariḳh-e-mohabbat hoti jaati hai
main jitna un ke asbab-e-jafa par ghaur karta huun
mujhe apni vafaon par nadamat hoti jaati hai
ba-in halat-e-mayusi ba-in ausaf-e-mahrumi
mohabbat hai ki muhtaj-e-mohabbat hoti jaati hai
zaban si len tire kahne se lekin is ko kya kiije
shikayat jab nahin hoti hikayat hoti jaati hai
hai mera ishq yak dar-gir mohkam-gir se baala
miri nazron men duniya ḳhubsurat hoti jaati hai
are tauba gunahon ke siyah-ḳhvabon se bedari
ki ankhen khulti jaati hain nadamat hoti jaati hai
yunhi tajdid-e-paiman-e-vafa kiije mire ham-dam
baḌi asan tashrih-e-mohabbat hoti jaati hai
mohabbat rafta rafta Dhal rahi hai vaza-dari men
ye kis raftar se barpa qayamat hoti jaati hai
jise tasvir kahna kufr hai a.in-e-ulfat men
vahi tanvir ma.abud-e-mohabbat hoti jaati hai
ma.al-e-ranj-o-rahat dekhta jaata hai dil jitna
tamanna tamanna-e-ranj-o-rahat hoti jaati hai
na ho mere na tum mujh ko kisi ka hone dete ho
qayamat kya ye bala-e-qayamat hoti jaati hai
beham-dillah main ‘ehsan’ is manzil pe aa pahuncha
musibat jab nahin hoti musibat hoti jaati hai
Leave a Reply