Iffat Abbas
nazar jo aaya us pe e.atibar kar liya gaya
haqiqaton ke dark se farar kar liya gaya
quyud-e-agahi se jab sahm ga.iin jibillaten
nazar ke gird rang ka hisar kar liya gaya
shuhud ki jo sat.h pe ananiyat ka shor uTha
to daman-e-ḳhudi ko tar-tar kar liya gaya
guman hua ki rasta abhi miri nazar men hai
sharir shutr-nafs be-mahar kar liya gaya
jo log dil ki uljhanon men gharq the ḳhamosh the
unhen bhi ahl-e-jazb men shumar kar liya gaya
rah-e-talab ki saḳhtiyon ke shikve lab-ba-lab hue
surur-e-jidd-o-jahd ko ḳhumar kar liya gaya
chale kabhi kabhi udhar se azmaton ke qafile
vafa ka azm jin se pa.edar kar liya gaya
vo ishq tha ki bandagi zaruraten ki agahi
bas ek rabt tha jo ustuvar kar liya gaya
varaq varaq rumuz-e-agahi ke the likhe hue
kutub ko bar-e-pusht-bar-himar kar liya gaya
usuul aur furua sab ‘shahab’ ek taraf hue
ajab nizam-e-zist iḳhtiyar kar liya gaya
Leave a Reply