insan huun ghir gaya huun zamin ke ḳhudaon men
ab bastiyan basa.unga ja kar ḳhalaon men
yadon ke naqsh kanda hain namon ke ruup men
ham ne bhi din guzare daraḳhton ki chhanv men
dauḌa ragon men ḳhuun ki tarah shor shahr ka
ḳhamoshiyon ne chhin liya chain gaanv men
yuun to ravan hain mere ta.aqub men manzilen
lekin main Thokaron ko lapeTe huun paanv men
vo aa ke chal diye hain ḳhayalon main gum raha
qadmon ki chaap dab ga.i dil ki sadaon men
sar rakh ke so gaya huun ghamon ki salib par
shayad ki ḳhvab le uḌen hansti fazaon men
ek ek kar ke log nikal aa.e dhuup men
jalne lage the jaise sabhi ghar ki chhanv men
sahra ki pyaas le ke chala jin ke saath saath
paani ki ek buund na thi un ghaTaon men
jalte gulab men na zara si bhi aanch thi
ham to jale hain hijr ki ThanDi ḳhizaon men
Leave a Reply