Bahadur Shah Zafar
vo sau sau atkhaton se ghar se bahar do qadam nikle
bala se us ki gar us men kisi muztar ka dam nikle
kahan aansu ke qatre khun-e-dil se hain baham nikle
ye dil men jama the muddat se kuchh paikan-e-gham nikle
mire mazmun-e-soz-e-dil se khat sab jal gaya mera
qalam se harf jo nikle sharar hi yak-qalam nikle
nikal ai charagar tu shauq se lekin sar-e-paikan
udhar nikle jigar se tiir udhar qalib se dam nikle
tasavvur se lab-e-laalin ke tere ham agar ro den
to jo lakht-e-jigar aankhon se nikle ik raqam nikle
nahin darte agar hon laakh zindan yaar zindan se
junun ab to misal-e-nala-e-zanjir ham nikle
jigar par daagh lab par dud-e-dil aur ashk daman men
tiri mahfil se ham manind-e-shama subh-dam nikle
agar hota zamana gesu-e-shab-rang ka tere
miri shab-diz sauda ka ziyada-tar qadam nikle
kaji jin ki tabiat men hai kab hoti vo sidhi hai
kaho shakh-e-gul-e-tasvir se kis tarah kham nikle
shumar ik shab kiya ham ne jo apne dil ke daghon se
to anjum charkh-e-hashtum ke bahut se un se kam nikle
khuda ke vaste zahid utha parda na kaabe ka
kahin aisa na ho yaan bhi vahi kafir-sanam nikle
tamanna hai ye dil men jab talak hai dam men dam apne
‘zafar’ munh se hamare naam us ka dam-ba-dam nikle
Leave a Reply