Thik Hai Ujli Yaad Ka Rishta Apne Dil Se TuTa Bhi

Thiik hai ujlī yaad kā rishta apne dil se TuuTā bhī

dariyā dariyā aag ugaltā lekin tum ne dekhā bhī

mere safar kī pahlī manzil jaane kab tak aa.egī

haañp rahā hai sadiyoñ purānā būḌhā nañgā rasta bhī

shor sharāba andar andar bāhar gahrī ḳhāmoshī

jaag uThegā ab ke shāyad koī bāġhī lamha bhī

sāgar motī siip ke qisse bātoñ tak mahdūd rahe

jholī jholī ḳhālī sab kī sab kā man hai mailā bhī

mausam mausam yaad meñ terī tanhā ham ne kaaT diye

ik lamhe ke mel kā rishta sach hai koī rishta bhī

pahle din se riit hai ye to phir in meñ pachhtānā kyā

pyaar vafā ke khel meñ ‘ārif’ ho jaatā hai dhoka bhī

Leave a Comment