kis vaqt hadson se paḌa sabiqa mujhe
ḳhud naag ban ke Dasta hai saaya mira mujhe
main ne ḳhushi se bar-e-amanat uTha liya
hairat se takte rah ga.e arz-o-sama mujhe
ehsa-e-dard lazzat-e-gham pyaar ka ḳhumar
mat puchh bazm-e-naz se kya kya mila mujhe
ye inkishaf-e-zat hai me.araj-e-zindagi
kuchh bhi nahin hai yaad ḳhuda ke siva mujhe
taqrir kaam aa.i na tahrir umr bhar
ik jumbish-e-nigah ne chaunka diya mujhe
phir muskura uThe hain mere zaḳhm-ha-e-dil
phir teri yaad ban ga.i ik saneha mujhe
sub.h-e-nashat-e-dil hai na sham-e-gham-e-‘hayat’
ai iztirab-e-shauq kahan le chala mujhe
Leave a Reply