Etiraf

Asrarul Haq Majaz

ab mire paas tum aai ho to kya aai ho

main ne maana ki tum ik paikar-e-ranai ho

chaman-e-dahr men ruh-e-chaman-arai ho

talat-e-mehr ho firdaus ki barnai ho

bint-e-mahtab ho gardun se utar aai ho

mujh se milne men ab andesha-e-rusvai hai

main ne khud apne kiye ki ye saza paai hai

khaak men aah milai hai javani main ne

shola-zaron men jalai hai javani main ne

shahr-e-khuban men ganvai hai javani main ne

khvab-gahon men jagai hai javani main ne

husn ne jab bhi inayat ki nazar daali hai

mere paiman-e-mohabbat ne sipar daali hai

un dinon mujh pe qayamat ka junun taari tha

sar pe sarshari-e-ishrat ka junun taari tha

mah-paron se mohabbat ka junun taari tha

shahryaron se raqabat ka junun taari tha

bistar-e-makhmal-o-sanjab thi duniya meri

ek rangin o hasin khvab thi duniya meri

jannat-e-shauq thi begana-e-afat-e-sumum

dard jab dard na ho kavish-e-darman malum

khaak the dida-e-bebak men gardun ke nujum

bazm-e-parvin thi nigahon men kanizon ka hujum

laila-e-naz barafganda-naqab aati thi

apni ankhon men liye davat-e-khvab aati thi

sang ko gauhar-e-nayab-o-giran jaana tha

dasht-e-pur-khar ko firdaus-e-javan jaana tha

reg ko silsila-e-ab-e-ravan jaana tha

aah ye raaz abhi main ne kahan jaana tha

meri har fatah men hai ek hazimat pinhan

har masarrat men hai raz-e-gham-o-hasrat pinhan

kya sunogi miri majruh javani ki pukar

meri fariyad-e-jigar-doz mira nala-e-zar

shiddat-e-karb men duubi hui meri guftar

main ki khud apne mazaq-e-tarab-agin ka shikar

vo gudaz-e-dil-e-marhum kahan se laun

ab main vo jazba-e-masum kahan se laun

mere saae se daro tum miri qurbat se daro

apni jurat ki qasam ab meri jurat se daro

tum latafat ho agar meri latafat se daro

mere vadon se daro meri mohabbat se daro

ab main altaf o inayat ka saza-var nahin

main vafadar nahin haan main vafadar nahin

ab mire paas tum aai ho to kya aai ho