Poet
aariz men tumhare kya safa hai
munh aa.ina apna dekhta hai
dumbala jo surme ka bana hai
ye tegh-e-nigah ka par tula hai
bimar jo teri chashm ka hai
nargis pe kab aankh Dalta hai
do laakh fareb-e-hazrat-e-ishq
banda na kahega but ḳhuda hai
sab kahte hain jis ko mah-e-kamil
naqsha kaf-e-pa-e-yar ka hai
gardish men hai chashm zer-e-abru
kya nimcha charḳh par chaḌha hai
maara hai dikha ke dast-e-rangin
shahid mire ḳhuun ki hina hai
phir aa.e bahar phir ho vahshat
dil roz dua.en mangta hai
kanTon se ye kah rahi hai laila
majnun mira barahna-pa hai
joban pe hain ab to anar-e-pistan
naḳhl-e-qad-e-yar kya phala hai
be-vaj.h jo phir ga.e ho phir jaao
bande ka bhi ai buto ḳhuda hai
jo chaho karo ki tum ho muḳhtar
majbur huun zor kya mira hai
karti nahin kyuun safar miri ruuh
kya band adam ka rasta hai
rone men hain yaad daant us ke
har ku har ashk be-baha hai
vasf us ka ‘qalaq’ ho kis zaban se
vo but ik qudrat-e-ḳhuda hai
Leave a Reply