Rais Amrohvi
ye karbala hai nazr-e-bala ham hue ki tum
namus-e-qafila pe fida ham hue ki tum
kyuun dajla-o-furat ke da.ave ki nahr par
tishna-dahan shahid-e-jafa ham hue ki tum
maana ki sab ajal ke muqabil the sar-ba-kaf
lekin shikar-e-tir-e-qaza ham hue ki tum
tum bhi fareb-ḳhurda sahi par ba-sad-ḳhulus
maqtul-e-makr-o-said-e-dagha ham hue ki tum
tum shaḳh-e-gul se uḌ ke ga.e shaḳh-e-gul ki samt
apne nashemanon se juda ham hue ki tum
ustad sabr-o-nukta-shanas-e-raza the tum
lekin katil-e-sabr-o-raza ham hue ki tum
sau baar raste men luTa hai jo karvan
us karvan ke rah-numa ham hue ki tum
paikan-e-neza-o-rasan-o-dar hai gavah
sar de ke sar-buland-e-vafa ham hue ki tum
paiman-e-shauq kis ne nibaha qadam qadam
aur haqq-e-ashiqi se ada ham hue ki tum
tum bhi nisar-e-dost the ham bhi nisar-e-dost
ḳhud faisla karo ki fida ham hue ki tum
tum bhi julus-e-mausam-e-gul men the pesh pesh
avara misl-e-bad-e-saba ham hue ki tum
tum laakh ham-safar the par insaf to karo
yaaro halak-e-laghzish-e-pa ham hue ki tum
Leave a Reply