tujh pe har haal men marna chahun
main to ye kaam hi karna chahun
hasil-e-zist hai jurm-e-ulfat
mar ke bhi main na mukarna chahun
apne uslub men chahun jiina
apne andaz men marna chahun
mutavajjah kare koi to use
misl-e-gul main bhi nikharna chahun
kitna mahdud hua jaata huun
main ki har had se guzarna chahun
ek jugnu huun magar dekh andaz
sub.h ki tarah bikharna chahun
surat-e-naghma-e-jan ai ‘ruhi’
main tire dil men utarna chahun
Leave a Reply