tiri fuzul bandagi bana na de ḳhuda mujhe
main kya huun aur tu samajh raha hai jaane kya mujhe
na tu nazar men hai kahin na dasht hai na shahr hai
ye kis ḳhala men khinch laa.e tere naqsh-e-pa mujhe
tu apna kaam kar guzar mujhe koi gila nahin
jo vaqt ne bana diya hava tujhe diya mujhe
tujhe hi sochte hue phir aaj so gaya huun main
guzar tira ho ḳhvab se to niind se jaga mujhe
vahan se dekhti hai kya hava-e-dast-e-mariya
zara mire qarib aa main ḳhaak huun uḌa mujhe
main jante hue bhi sab ḳharidta chala gaya
vo ashk bechta raha bata ke qahqaha mujhe
mile tamam log zindagi ki dhup-chhanv men
bas ek ‘imtiyaz’ hi kahin nahin mila mujhe
Leave a Reply