Shahid Kamal
ba-harf-e-surat inkar toḌ di main ne
dilon ke biich ki divar toḌ di main ne
vo be-ḳhudi men tira naam lab pe aa hi gaya
lo ye qasam bhi mire yaar toḌ di main ne
tire ghubar-e-kaf-e-pa ki kaj-kulahi men
ghurur-o-naḳhvat-e-dastar toḌ di main ne
is ajizi se kiya us ne mere sar ka saval
ḳhud apne haath se talvar toḌ di main ne
kuchh is tarah se baḌhi lazzat-e-ḳhalish dil ki
jigar men dard ki sufar toḌ di main ne
sada-e-nala-e-be-iḳhtiyar se apne
tire sukut ki raftar toḌ di main ne
mire jasarat-e-tarz-e-suḳhan ki daad to de
rivayat-e-lab-o-ruḳhsar toḌ di main ne
Leave a Reply