Tauqeer Taqi
badan men ruuh ki tarsil karne vaale log
badal ga.e mujhe tabdil karne vaale log
abad talak ke manazir sameT lete hain
zara si aankh ko zambil karne vaale log
tumhi batao tumhen chhoḌ kar kidhar jaa.en
tumhari baat ki ta.amil karne vaale log
kise bata.en ki shaḳh-e-salib kaun si hai
ye paat paat ko injil karne vaale log
zamin pe aa.e the kar-e-payambari ke liye
zamin supurd-e-azazil karne vaale log
andheri raat hai ḳheme men ik diya bhi nahin
kahan hain sabr ko qindil karne vaale log
ubuur kar ke ise ho ga.e kahan abad
hayat rahguzar-e-nil karne vaale log
ham apne ishq se duniya badalna chahte hain
magar ye ishq ki tazlil karne vaale log
Leave a Reply