Poet
kitna udaas udaas ye daur-e-hayat hai
insan ki zindagi nahin jangal ki raat hai
jab chhiḌ ga.i ghazal tiri ankhen chamak uThin
avaz meri jaise tire dil ki baat hai
Dhalti hai teri yaad ki shabnam se gard-e-gham
dushvar varna kitni ye rah-e-hayat hai
chhoḌa na teri yaad ne ik lamha dil ka saath
ham tujh se be-ḳhabar rahe ye aur baat hai
ai kaash tum bhi aise men hote mire qarib
bhigi hui sharab men savan ki raat hai
tum bhi vahi ho main bhi vahi huun phir aaj kyuun
vo pursish-e-karam hai na vo iltifat hai
apni tabahiyon ka gila kis se ham karen
duniya ke saath saath tumhara bhi haat hai
dil un ki bazm-e-naz men tasvir ban na jaa.e
kahni kisi se aaj mujhe ek baat hai
kyuun kar asar kare na mira sher ai ‘shahab’
mere dil-e-shikasta ki ye vardat hai
Leave a Reply