Shagufta Shafiq
saath chhuTe nahin ab gavara mujhe
chahe ilzam de jag ye saara mujhe
teri chahat ne aisa nikhara mujhe
jhuk ke takne laga har sitara mujhe
tu na ho paas mere to ai jan-e-jan
koi lagta nahin tujh sa pyara mujhe
be-ḳhudi men chali aa.i teri taraf
tu ne jab jab kiya hai ishara mujhe
pyaar ne tere mas.hur sa kar diya
tu ne jab se diya hai sahara mujhe
sab ki jhuTi navazish se tang aa ga.i
ab na koi pukare ḳhudara mujhe
saath tu jo ‘shagufta’ ke chalne laga
achchha lagne laga har nazara mujhe
Leave a Reply