Sath chhuTe Nahin Ab Gawara Mujhe

saath chhūTe nahīñ ab gavārā mujhe

chāhe ilzām de jag ye saarā mujhe

terī chāhat ne aisā nikhārā mujhe

jhuk ke takne lagā har sitārā mujhe

tū na ho paas mere to ai jān-e-jāñ

koī lagtā nahīñ tujh sā pyārā mujhe

be-ḳhudī meñ chalī aa.ī terī taraf

tū ne jab jab kiyā hai ishārā mujhe

pyaar ne tere mas.hūr sā kar diyā

tū ne jab se diyā hai sahārā mujhe

sab kī jhūTī navāzish se tang aa ga.ī

ab na koī pukāre ḳhudārā mujhe

saath tū jo ‘shagufta’ ke chalne lagā

achchhā lagne lagā har nazārā mujhe

Leave a Comment