Shaad Aarfi
hamari ghazlon hamare sheron se tum ko ye agahi milegi
kahan kahan karvan luTe hain kahan kahan raushni milegi
jahan milenge buton ke honTon pe yuun to gahri hansi milegi
magar ba-batin ḳhulus o sha.istagi men vazeh kami milegi
usi samay ham ne un ko Toka tha baghban jab ye kah rahe the
bahar aate hi ji uThega chaman na.i zindagi milegi
sambhal sambhal kar qadam baḌhate hain is tarah maslahat ke pairav
ki jaise sikke ki tarah raste men kamyabi paḌi milegi
hamen sata kar jo hain pasheman dil men shayad vo bach bhi jaa.en
hamen sata kar jo mutma.in hain unhen saza lazmi milegi
bhare hue saghar o subu men sharab bhar pa.ega na saaqi
to phir ghariqan-e-aish-o-ishrat ko ḳhaak asudgi milegi
nahin hai insaniyat ke baare men aaj bhi zehn saaf jin ka
vo kah rahe hain ki jis se neki karoge us se badi milegi
gham-e-mohabbat ke ba.ad aati hai sarhad-e-iltifat-e-janan
sharab ki talḳhiyan sahoge to lazzat-e-be-ḳhudi milegi
ye bad-gumanan-e-anjuman ‘shad’ kis liye jaan kho rahe hain
naqab uThane ke ba.ad bhi us nigah men barhami milegi
Leave a Reply