Dheerendra Singh Faiyaz
meri ḳhamoshi hi kaam aa.i kaha jaata hai
is ko andaz-e-shakeba.i kaha jaata hai
bhiiḌ men ek badan aap se manus na ho
bas yahi vaqi.a tanha.i kaha jaata hai
teri janib se jo hote hain ishare un ko
ishq men hausla-afza.i kaha jaata hai
meri vahshat ne andhere men use DhunDh liya
ab usi taab ko bina.i kaha jaata hai
tere aariz ko jo aati hain hava.en chhu kar
un ko is des men purva.i kaha jaata hai
kah diya tha mire jis lahje ko duniya ne fuzul
ab vahi sher ki gahra.i kaha jaata hai
lafz-ara.i ka to mujh men hunar hai lekin
mujh ko aati nahin goya.i kaha jaata hai
Leave a Reply