Masoom Sharqi
dushman ke tanz ko bhi saliqe se Taal de
apne mazaq-e-tab.a ki aisi misal de
baḳhshe bahar ko jo na sha.istagi ka rang
aisi har ek shai ko chaman se nikal de
pichhli ruton ke daagh to sab maand paḌ ga.e
ab ke bahar zaḳhm koi la-zaval de
main bhi to rah-rau huun tira rahguzar-e-shauq
thoḌi si dhuul meri taraf bhi uchhal de
‘ma.asum’ saf-goi baḌi chiiz hai magar
aisa na ho kahin ye musibat men Daal de
Leave a Reply