Muddat Hui Rahat Bhara Manzar Nahin Utra

muddat huī rāhat bharā manzar nahīñ utrā

sāvan kā mahīna mirī chhat par nahīñ utrā

raushan rahā ik shaḳhs kī yādoñ se hamesha

girdāb meñ zulmat ke mirā ghar nahīñ utrā

jis aañkh ne dekhā tumheñ detī hai gavāhī

tum jaisā zamīñ par koī paikar nahīñ utrā

sachchā.ī mire hoñToñ se utrī nahīñ hargiz

jab tak mire kāñdhoñ se mirā sar nahīñ utrā

qudrat kī ibārāt ko paḌhte rahe barsoñ

mafhūm magar zehn ke andar nahīñ utrā

nashsha hī kuchh aisā thā futūhāt kā us par

jazbāt ke tausan se sikandar nahīñ utrā

sāhil pe jo utrā thā safīnoñ ko jalā kar

sadiyoñ se phir aisā koī lashkar nahīñ utrā

utrā nahīñ nafrat ke samundar meñ kabhī maiñ

mujh meñ kabhī nafrat kā samundar nahīñ utrā

koshish to bahut kī thī ‘ḳhumār’ ham ne bhī lekin

shīshe meñ vo ik shoḳh sitamgar nahīñ utrā

Leave a Comment