Farhat Nadeem Humayun
ai katib-e-taqdir ye taqdir men likh de
bas us ki mohabbat miri jagir men likh de
de aisa junun jaisa diya qais ko tu ne
mujh ko bhi isi halqa-e-zanjir men likh de
paane ka use ḳhvab jo dekha hai hamesha
vo ḳhvab hi bas ḳhvab ki ta.abir men likh de
dil aisa makan hai jo agar TuuT gaya to
lag ja.engi sadiyan na.i ta.amir men likh de
milna hai agar ḳhud se to phir der na karna
kho jaane ka Dar hota hai taḳhir men likh de
sachcha.i mira jurm hai aur kar-e-vafa bhi
munsif hai to ye bhi miri ta.azir men likh de
likh de ki main ‘ghalib’ ka muqallid huun ghazal men
phir naam mira mo’taqid-e-‘mir’ men likh de
Leave a Reply