kis kis se dosti hui ye dhyan men nahin
un men se ek bhi mire saman men nahin
rasm-e-vafa ka us se nibhana bhi hai muhal
tark-e-ta.alluqat bhi imkan men nahin
bandhen kisi se ahd-e-vafa ham to kis tarah
ik taar bhi to apne gareban men nahin
kyuun ham ne haar maan li kyuun Daal di sipar
ye saneha shikast ke elaan men nahin
ye jaan supurdagi hai usi ek baat par
jo baat mere ishq ke paiman men nahin
shoridgi ko hain sabhi asudgi nasib
vo shahr men hai kya jo bayaban men nahin
’tishna’ vo shab likhi hai hamare nasib men
jis ki sahar ka zikr bhi imkan men nahin
Leave a Reply