Najeeb Ahmad
ek meri jaan men aur ik lahar sahraon men thi
kuchh nukile sang the kuchh ret dariyaon men thi
kya hua vo garm dopahron men yaḳh hona mira
kya hui vo dhuup si lazzat ki jo chhanv men thi
kya ḳhabar kya jism the kyuun mauj-e-sahra ho ga.e
kya bata.en kis bala ki guunj dariyaon men thi
shahr vaale kab ke mahrum-e-basarat ho chuke
ratjage ki rasm to bas aankh ke gaanv men thi
apne sauda ke liye ye izzat-e-sang-e-rasa
kuchh adu ke haath men kuchh apni rekhaon men thi
ab to jismon men lahu ki buund tak baaqi nahin
phir bhi ham ko luTne ki hirs aqaon men thi
tu agar azad lamhon ka payambar hai ‘najib’
raat ki zanjir kyuun phir vaqt ke paanv men thi
Leave a Reply