jo Dar apnon se hai ghairon se vo Dar ho nahin sakta
ye vo ḳhanjar hai jo siine se bahar ho nahin sakta
jo sach puchho to ye tasvir bhi hai saneha jaisi
kisi bhi sanehe par koi shashdar ho nahin sakta
khaTakti hai kisi shai ki kami is dar-e-fani men
shikasta bam-o-dar jis ke na hon ghar ho nahin sakta
ye aḳhir kyuun ki har din ek mausam ek hi manzar
jahan zer-o-zabar ho us se behtar ho nahin sakta
na shamil ho jo ashufta-ḳhayali zehn-e-mohkam men
vo kuchh bhi ho chaman-zar-e-muattar ho nahin sakta
kali ka lab badan kundan ka qamat sarv ki lekin
vafa na-ashna mere barabar ho nahin sakta
faqat surat men kya rakkha hai ai husn-e-tamasha hain
ki kar-e-a.ina se main sikandar ho nahin sakta
kisi ko chahne se baaz aana kaise mumkin hai
likha hai jo kitabon men vo aksar ho nahin sakta
tire inkar ko is zaviye se dekhta huun main
tira milna bhi me.ar-e-muqaddar ho nahin sakta
ye maana aib bhi hain saikḌon kis men nahin hote
‘amin-ashraf’ magar tujh sa qalandar ho nahin sakta
Leave a Reply