Zafar Iqbal
iman ke saath khami-e-iman bhi chahiye
azm-e-safar kiya hai to saman bhi chahiye
kuchh asl to khule kahin is zor-o-shor kia
dariya ke raste men bayaban bhi chahiye
bhadka to hai badan men lahu ka gulab sa
mushkil hai ye ki tangi-e-daman bhi chahiye
us ke nai qamis ke tohfe ka shukriya
lekin yahan to pairahan-e-jan bhi chahiye
is tirgi men partav-e-mahtab-e-rukh ke saath
kuchh aks-e-aftab-e-gareban bhi chahiye
mushkil-pasand hi sahi main vasl men magar
ab ke ye marhala mujhe asan bhi chahiye
kuchh us taraf bhi josh-e-jafa hai naya naya
kuchh zulm apni shaan ke shayan bhi chahiye
darte bhi rahiye us se ki is men bhi hai maza
lekin kabhi kabhi zara shun-shan bhi chahiye
mashshatagi-e-maana bahut ho chuki ‘zafar’
kuchh roz ab ye zulf pareshan bhi chahiye
Leave a Reply