Dil Ayubi
hasin hai shahr to ujlat men kyuun guzar jaa.en
junun-e-shauq use bhi nihal kar jaa.en
ye aur baat ki ham ko nazar nahin aa.e
magar vo saath hi rahta hai ham jidhar jaa.en
hayat-e-ishq ka maqsud ban ga.i aḳhir
ye aarzu ki tira naam le ke mar jaa.en
ye rah-e-ishq hai aḳhir koi mazaq nahin
sa.ubaton se jo ghabra ga.e hon ghar jaa.en
pahunch ke manzil-e-maqsud par hi dam lenge
ki chal paḌe hain to kis munh se lauT kar jaa.en
Leave a Reply