Dheerendra Singh Faiyaz
ansuon ne bhi to kar di hai taraf-dari dekh
mujhe mat dekh miri aankh ki dushvari dekh
shaam Dhalte hi charaghon ki tarah jalti hain
ya.ani bas aankh nahin aankh ki bedari dekh
main tire hijr men hansta huun to hairat kaisi
mujhe mat dekh miri jaan ada-kari dekh
main ne alfaz baratne men lahu ḳharch kiya
ab tira farz hai tu sher ki tahdari dekh
mere honTon ke tabassum se na andaza laga
kis qadar mathe pe rakkhi hai shikan bhari dekh
tere chhune se miri nabz bhi ruk jaati hai
aa mujhe haath laga aur kala-kari dekh
tere kahne ke sabab socha na manzil ke ta.iin
ghar se nikla to abhi tak hai safar jaari dekh
Leave a Reply