Ada Jafarey
ujala de charagh-e-rahguzar asan nahin hota
hamesha ho sitara ham-safar asan nahin hota
jo ankhon ot hai chehra usi ko dekh kar jiina
ye socha tha ki asan hai magar asan nahin hota
bade taban bade raushan sitare tuut jaate hain
sahar ki raah takna ta-sahar asan nahin hota
andheri kasni raten yahin se ho ke guzrengi
jala rakhna koi dagh-e-jigar asan nahin hota
kisi dard-ashna lamhe ke naqsh-e-pa saja lena
akele ghar ko kahna apna ghar asan nahin hota
jo tapke kasa-e-dil men to aalam hi badal jaae
vo ik aansu magar ai chashm-e-tar asan nahin hota
guman to kya yaqin bhi vasvason ki zad men hota hai
samajhna sang-e-dar ko sang-e-dar asan nahin hota
na bahlava na samjhauta judai si judai hai
‘ada’ socho to khushbu ka safar asan nahin hota
Leave a Reply