Sajjad Baqar Rizvi
ghirte badal men tanha.i kaisi lagti hai
milan ka mausam aur juda.i kaisi lagti hai
suune man ke taron se jab baten hoti hon
duuje angan ki shahna.i kaisi lagti hai
dil ki choT ubhar aa.e aur zaḳhm hare ho jaa.en
yadon ki chalti purva.i kaisi lagti hai
tum ko shahr-e-ḳhayal men rahna kaisa lagta hai
vo basti jo dil ne basa.i kaisi lagti hai
chaḌhte ruup ki suraj devta aur bhi maan baḌha.en
dhundli ankhon ki bina.i kaisi lagti hai
jag biite jab jagmag ye dil us ki jot se tha
ab jo vo surat phir yaad aa.i kaisi lagti hai
dil to apna bhar bhar aa.e niyyat nahin bhare
umr ka hasil aisi kama.i kaisi lagti hai
bachpan aur javani buḌhi umr ke dar pe hain
tinon zamanon ki yakja.i kaisi lagti hai
‘baqar’ saari umr guzari ku-e-malamat men
aḳhir umr ki ye rusva.i kaisi lagti hai
Leave a Reply