Ateeq Anzar
kisi ne bheja hai ḳhat pyaar aur vafa likh kar
qalam se kaam diya hai mujhe ḳhuda likh kar
faqat salam hi likhta tha peḌ ko ḳhat men
main aaj ḳhush huun bahut phuul ko dua likh kar
mujhe bacha ke na kar adl ka lahu ai dost
qalam ko toḌ miri maut ki saza likh kar
mujhe charaghon ke bujhne ka gham to hai lekin
mira zamir hai zinda tujhe hava likh kar
tum asman ko agar likh sako zamin to phir
gira do mujh ko mire fan pe tabsira likh kar
Leave a Reply