kuchh saa.e se har lahza kisi samt ravan hain
is shahr men varna na makin hain na makan hain
ham ḳhud se juda ho ke tujhe DhunDne nikle
bikhre hain ab aise ki yahan hain na vahan hain
jaati hain tire ghar ko sabhi shahr ki saḌken
lagta hai ki sab log tiri samt ravan hain
ai mauj-e-avara kabhi ham se bhi Takra
ik umr se ham bhi sar-e-sahil nigaran hain
to DhunDh hamen vaqt ki divar ke us paar
ham duur bahut duur ki manzil ka nishan hain
simTe the kabhi ham to sama.e sar-e-mizhgan
phaile hain ab aise ki karan-ta-ba-karan hain
ik din tire anchal ki hava ban ke uḌe the
us din se zamane ki nigahon se nihan hain
toḌo na hamare liye avaz ka ahang
ham log to ik Dubte lamhe ki fughan hain
Leave a Reply