tanha.i ki gali men havaon ka shor tha
ankhon men so raha tha andhera thaka hua
siine men jaise tiir sa paivast ho gaya
tha kitna dil-ḳharash udasi ka qahqaha
yuun bhi hua ki shahr ki saḌkon pe bar-ha
har shaḳhs se main apna pata puchhta phira
barson se chal raha hai koi mere saath saath
hai kaun shaḳhs us se main ik baar puchhta
dil men utar ke bujh ga.i yadon ki chandni
ankhon men intizar ka suraj pighal gaya
chhoḌi hai un ki chaah to ab lag raha hai yuun
jaise main itne roz andheron men qaid tha
main ne zara si baat kahi thi mazaq men
tum ne zara si baat ko itna baḌha liya
kamre men phailta raha cigarette ka dhuan
main band khiḌkiyon ki taraf dekhta raha
‘azar’ ye kis ki samt baḌhe ja rahe hain log
is shahr men to mere siva koi bhi na tha
Leave a Reply