pas-e-adab men josh-e-tamanna liye hue
main bhi huun ik hubab men dariya liye hue
rag rag men aur kuchh na raha juz ḳhayal-e-dost
us shoḳh ko huun aaj sarapa liye hue
sarmaya-e-hayat hai hirman-e-ashiqi
hai saath ek surat-e-zeba liye hue
josh-e-junun men chhuT gaya astan-e-yar
rote hain munh men daman-e-sahra liye hue
‘asghar’ hujum-e-dard-e-gharibi men us ki yaad
aa.i hai ek tilismi tamanna liye hue
Leave a Reply