Poet
gham-e-janan men samo kar gham-e-dauran ham ne
do fasanon ko diya ek hi unvan ham ne
gham se ghabra ke jo ki koshish-e-darman ham ne
aur bhi kanTon men uljha liya daman ham ne
dekhen kya hota hai tajdid-e-nasheman ka saman
muntaḳhab ki hai phir ik shaḳh-e-gulsitan ham ne
gham se bachne ke liye vaz.a kiye the jo usuul
kar diye nazuki-e-vaqt pe qurban ham ne
aaj ‘muḳhtar’ asir-e-gham-e-dauran hai vo dil
jis ko samjha tha harif-e-gham-e-dauran ham ne
Leave a Reply