Abdussalam Asim
ashar men mafhum fasane men kahani
mat dhund ki uljhate hain alfaz-o-maani
sad shukr vo taabir se mashrut nahin thiin
bachpan men suna karte the jo khvab kahani
vo zindagi jo paane aur khone se siva ho
zeb us ko nahin deti kabhi marsiya-khvani
fitrat ke taqaze pe na kar rah-e-amal band
iqbal ki ye baat kisi ne bhi na maani
takmil-e-junun ab bhi hai is misre se mashrut
ai chand mubarak ho tujhe raat suhani
khush-haliyan dehli ki baja aaj bhi lekin
yaad aati hai kalkatte ki vo shokh javani
pardes men bas zehn se abad hai ‘asim’
dil se nahin kar paaya kabhi naql-e-makani
Leave a Reply