Safi Aurangabadi
shab-e-hijr aah kidhar ga.i kahun kis se naala kidhar gaya
jo guzar ga.i vo guzar ga.i jo guzar gaya vo guzar gaya
jo tumhari aankh se gir paḌa jo tumhare dil se utar gaya
vo gharib jite-ji mar gaya vo kahan gaya vo kidhar gaya
koi apne bachne ka Dhab nahin koi zindagi ka sabab nahin
mire paas dil bhi to ab nahin vo idhar ga.e ye udhar gaya
koi dard ho to dava karun na bane dava to dua karun
use kya kahun use kya karun ki main un ke dil se utar gaya
use dil-lagi ka maza mila use ashiqi ka maza mila
use zindagi ka maza mila jo tiri adaon pe mar gaya
koi dost hai ki ghulam hai koi ye bhi tarz-e-kalam hai
vo kahan gaya vo kahan gaya vo kidhar gaya vo kidhar gaya
tire zulm aur sitam sahe tire jan-nisar bhi ham rahe
na raqib jis ko har ik kahe ki tiri jafaon se Dar gaya
rahe kyuun na siine men dam ḳhafa ye naya sitam hai na.i jafa
kahun kya safi’ koi bevafa mire dil ko le kar mukar gaya
Leave a Reply